*************
الدرس انتهى لموا الكراريس
بالدم اللى على ورقهم سال
فى قصر الامم المتحدة
مسابقة لرسوم الطفال
ايه رأيك فى البقع الحمرا
ياضمير العالم يا عزيزى
دى لطفلة مصرية وسمرا
كانت من اشطر تلاميذى
دمها راسم زهرة
راسم رايه ثورة
راسم وجه مؤامرة
راسم خلق جبارة
راسم نار
راسم عار
ع الصهيونية والاستعمار
والدنيا اللى عليهم صابرة
وساكتة على فعل الاباليس
الدرس انتهى لموا الكراريس
ايه رأى رجال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بألف جناح
فى دنيا مليانة بالأشباح
لكنها قلبها مرتاح وساكتة على فعل الأباليس
الدرس انتهى لموا الكراريس
ايه رأيك يا شعب الحرار
دم الاطفال جايلك يحبى
يقول انتقموا من الاشرار
ويسيل على الاوراق
يتهجى الاسماء
ويطالب الآباء
بالثأر للأبناء
ويرسم سيف يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الأباليس
الدرس انتهى لموا الكراريس